【球員簡介⚽️💁🏻‍♂️】

九龍城區體育會






嚟到今季最後一位要介紹嘅球員,當然要同之前嘅有啲唔同啦。喺過去介紹嘅六位球員,佢哋都係今季新加入九龍城,不過以下呢位,早喺5年前已經為九龍城效力過3季,今年再度回歸。


踢中堅嘅王逸軒(猩猩)自中五加入中西區參與足總乙組聯賽,入讀大學時亦有加入港大校隊,喺丙組聯賽中上陣。2016年大學畢業後加入九龍城,效力3季後退出,直至今季球隊重組後再加入。


被問到點解會再加入九龍城,猩猩提起總教練劉棟平(沙皮Sir)嘅名字,因為得知沙皮Sir今季重返球隊執教,亦見球隊有心發展,加上部分舊隊友例如洪偉強、李家勁同何俊銘都重返球隊,所以主動加入。


相對以往嘅九龍城隊,猩猩感覺到練波氣氛同以往有別,「知道目標係咩,每次都帶到嘢走,有清晰嘅訓練」。佢亦提到,今季訓練出席率高,相比以往唔會夠22人比賽。


猩猩係球隊中相對年紀較大嘅球員,對於未來發展,佢希望球隊可以不斷進步,即使升班並唔容易,亦希望隊友可以Keep住團火,以升班作為目標,同時自己亦可以喺掛靴前,完成參與甲組賽事嘅里程碑。


•••••••••••••••••••••••••••••••••••••••••••••••••••••••••••••••••

【個人檔案🧍🏻‍♂️】

姓名:王逸軒

位置:​中堅

球衣號碼:15

出生日期:28/1/1992 (29歲)

身高:180cm

體重:90kg



速度:⚽️⚽️◯◯◯

射門:⚽️⚽◯◯◯

傳球:⚽️⚽️◯◯◯

盤球:⚽️⚽️◯◯◯

防守:⚽️⚽️⚽️⚽️◯

體能:⚽️⚽️⚽️◯◯


#九龍城 #乙組 #足球 #足總 #前鋒 #王逸軒 #中堅 #15號


35 次瀏覽0 則留言