九龍城區體育會
九龍城今季重整旗鼓，除咗有唔少甲組球員加盟外，亦吸引到部分過往曾效力九龍城嘅球員回流，陳思朗就係其中一人。思朗過往除咗效力九龍城同花花外，亦都喺2019年以外援身份到澳門參與乙丙組聯賽。
思朗受沙皮Sir邀請下今季重回九龍城踢左右閘，經過上半季試練，最初以不敗升班作為目標，但結果未如預期所料，暫時以10勝1和1負排榜首。思朗就抱樂觀心態：「無話贏晒嘅，總會有意外」，認為最緊要係大家有盡力。
疫情下球場被封，對於球員都有好大影響，特別係出戰足總盃初級賽嘅一班球員。思朗提到，盃賽頭兩場賽事都勝出令球員心態更強，但賽事延期會令心態放慢，球員亦都未必可以保持最好狀態，「無得練波就要靠自己個人自律，可能落街跑下步。」
雖然疫情下重賽仍然無期，但對於駿英九龍城球員嚟講依然會以升班作為目標。思朗希望失球數字可以控制喺10球內，自己就以「盡量做多啲助攻，唔俾人咁容易打穿位」作為目標，希望球隊下半季可以不敗升班。
_________
PERSONAL PORTFO
姓名 | 陳思朗 (思朗)
位置 | 左右閘
球衣號碼 | 92
出生日期 | 17/9/1992（29歲)
身高 | 163cm
體重 | 60kg
