球員簡介 - 鍾偉豪

九龍城區體育會



面對超聯球隊減少,要成為全職球員變成更困難嘅事。 年輕時曾替公民、油尖旺、黃大仙上陣,而職業球員年代亦曾效力過元朗、港超聯愉園等球會嘅鍾偉豪(粟米)喺上季完結後收到董教練邀請,今季加盟駿英九龍城。粟米坦言面對生計問題,唯有一邊做兼職,一邊以乙組球員身分繼續追足球夢。 加入球隊近三個月,粟米覺得球隊表現同預期差唔多,以而家「人腳」可以做得更好,有信心可以升班。對於自己嘅表現,佢希望可以調整心態,「以前踢開職業,好火爆,成日都鬧」,但現時轉到乙組,明白其他隊友都係放工過嚟踢已經好辛苦,希望可以更體諒其他隊友。 喺球場上,不時都聽到粟米提醒年輕球員嘅情緒管理,佢就話其實都想將改變自己嘅心態感染埋其他隊員,但要改變人哋先要做好自己。佢都認同喺場上係應該要「有火」,不過都希望大家盡量克制。 粟米喺訪問中都有提到啱啱一歲嘅囡囡,佢話而家都以屋企人同小朋友為中心,希望將時間分配喺工作、足球同家人上。面對球隊未來發展,佢期望可以協助球隊升上超聯,「有機會都想跟上超聯,繼續追足球夢。」 ___________________________ PERSONAL PORTFO 姓名 | 鍾偉豪(粟米) 位置​ | 守門員 球衣號碼 | 1 出生日期 | 17/11/1990 (31歲) 身高 | 175cm 體重 | 79kg #駿英九龍城 #九龍城 #乙組 #足球 #KCDSA #香港足球 #鍾偉豪 #守門員

9 次瀏覽0 則留言